So lyk ons, Anton en San-Mari Ferreira:.

Ek is in Virginia in die Vrystaat gebore en het die grootste deel van my kinderjare opgegroei in Heidelberg (Gauteng), maar aan Sasolburg Hoër gematrikuleer. San-Mari is in Bloemfontein gebore, daar groot geword en sy het aan die Hoërskool Sentraal gematrikuleer. Ons het albei by Kovsies studeer (Ek Teologie en San-Mari Maatskaplike Werk) en aan die einde van ons eerste jaar (ek het eers Nasionale diensplig gedoen) het ons deur middel van ‘n ‘Blind date’ ontmoet. Ons is op 21 September 1991 getroud. Ons het aan die begin van 1993 na Secunda verhuis, waar ek in ‘n proponentspos aangestel is in Secunda-Oos gemeente. Ons is aan die einde van 1993 beroep as derde leraar in dieselfde gemeente. Dit is hier waar ons kinders Retske (1995) en Vian (1999) gebore is. Ons is in 2003 na Krugersdorp-Oos gemeente beroep, nadat ons meer as tien wonderlike jare in Secunda deurgebring het. Ons was die afgelope 20 jaar (op drie maande na) in Krugersdorp-Oos Gemeente in die bediening gewees en het ook wonderlike jare daar beleef met baie uitdagings en baie seëninge.

Ons glo die Here het vir ons die deur oopgemaak vir hierdie nuwe hoofstuk in ons lewe en ons bediening hier in die NG Gemeente Gamtoosvallei-Oos in Patensie en ons glo ook dat ons hier net so gelukkig gaan wees as in die vorige twee gemeentes waar die Here ons gebruik het.  

Anton en San-Mari

Jesaja 30:15 – Want so sê my Heer, die Here, die Heilige van Israel: “In bekering en rustigheid lê julle redding, in kalmte en vertroue lê julle krag.” (2020 vertaling)